Indre Sogn sorenskriveri hadde i 1647 skipreidene Lærdal, Borgund, Årdal, Luster, Jostedal, Solvorn, Marifjøra, Sogndal og Norum. Skipreidene Aurland og Norum saman med gardane Frønningen og Lagmannsås i Tjugum vart overført frå Ytre Sogn til Indre Sogn ved reskript 2. februar 1813, men vart ført attende til Ytre Sogn frå 1. januar 1831 etter kongeleg resolusjon 30. oktober 1830. Aurland tinglag vart overført frå Ytre Sogn til Indre Sogn ved kongeleg resolusjon 24. september 1918. Solvorn og Marifjøra vart slegne saman til Hafslo tinglag og Sogndal og Norum til Sogndal tinglag frå 1. juli 1890 etter kongeleg resolusjon 17. mai 1890. Ved kongelege resolusjonar 10. november 1961 og 22. juni 1962 er gnr. 1/1 og 2/4 i Årdal kommune overflytta til Lærdal (gnr. 46/1 og 47/1), og Borgund gnr. 1-35 til gnr. 48-82. Ved kongelege resolusjonar 5. april og 21. juni 1963 vart Tingastad almenning gnr. 32/1 og 2 i Leikanger overført til Sogndal frå 1. januar 1964.