Oppretta i 1912 som Hareid sygepleieforening, som først var medlem i Den norske Nasjonalforening mot tuberkulose, og i 1916 melde seg inn i Norske Kvinners Sanitetsforening. I 1935 vart namnet endra til Hareid sykepleie - og sanitetsforening - og i 1938 til Hareid sanitetslag. I 1922 skipa Hareid sanitetslag arbeidslag i Brandal, Hjørungavåg og Holstad med Hareidsdalen. I 1925 skipa dei arbeidslag på Bigset og i Snipsøyrdalen. I 1930 starta dei opp legekontroll av skulebarn og arbeid for eit folkebad. I 1937 starta dei med skuletannrøkt. Hareid kommune tok over legekontroll av skulebarn i 1937 og skuletannrøkt i 1943. I 1945 starta Hareid sanitetslag kontroll av mødre og spebarn - overteke av Hareid kommune i 1974. I 1947 tilsette dei barselpleierske. I 1950 erstatta ein samaritt sjukepleierska i Hareid. Hareid sanitetslag si sjukestove ved aldersheimen stod ferdig til bruk i 1960. I 1964 starta Hareid sanitetslag ordninga med heimehjelp - overteke av Hareid kommune i 1968. I 1967 sette Hareid sanitetslag igong masseundersøking av kreft i livmorhalsen - og i 1972 tilbydde dei etterundersøking i Hareid av livmorkreft. I 1968 starta dei fotpleie for eldre. 1970 ga dei lån til kjøp av ny sjukebil. 1977 opna Hareid sanitetslag varmtbadet - som dei renoverte og opna på nytt i 1999. I 1977 engasjerte dei seg også i blodtrykksmåling. 1986 starta dei utleige av bilsete for barn. I 1992 ga dei møblar og utstyr til eldresenteret på Hadartun. 1993 tilbaud Hareid sanitetslag mammografi til alle mellom 50 og 70 år. I 2002 finansierte dei teleslynge til kapellet og vinterhagen på Hadartun. 2006 arrangerte dei aksjon mot nedlegging av følgeteneste for fødande. I 2010 støtta dei Veiledningssenteret for pårørende til rusmisbrukarar i Midt-Norge. Varmtbadet vart beslutta nedlagt i 2020. Arbeidslaga i Brandal, Bigset og Hjørungavåg vart også nedlagde i 2020. Kjelde: Som ringar i vatnet. Hareid sanitetslag 1912 - 2012. Inga Ishild Hareide, 2012.