Bakgrunn Nordland fylkeskommune starta på midten av 1980-talet Stadnamnprosjektet i Nordland med sikte på å dokumentere stadnamntilfanget i Nordland. Arbeidet vart drive i samarbeid med kommunane og friviljuge organisasjonar, og fram til prosjektet vart avvikla i 2004, kom det til ca. 165 000 namn i stadnamnbasen. Innsamlingsarbeidet vart finansiert av Kyrkje- og kulturdepartementet og Nordland fylkeskommune. Arbeidet vart leia av cand. philol. Finn Myrvang som er ein framståande fagmann på området og som har fått merksemd for arbeidet, jfr. vedlagte fråsegn frå Botolv Helleland. Prosjektet vart i 1995 integrert i Arkiv i Nordland. Produktet frå Stadnamnprosjektet er ein database med informasjon om namna, som kartreferanse og språkfaglege og kulturhistoriske opplysningar, og ei samling med kartblad der stadnamna er teikna inn med ein talverdi. Informasjonen er likevel lite tilgjengeleg for publikum fordi databasen berre kan nyttast gjennom eit spesiallaga dataprogram, og fordi denne type informasjon best kan formidlast visuelt på dynamiske, digitale kart eller flyfoto via Internett. Etter at Stadnamnprosjektet vart avvikla i 2004, har vi ingen øyremerkte midlar til formidling av materialet.